На лаве падсудных — шэсьць чалавек, якія не прызналі віны. Абвінавачваньне сьцьвярджае, што яны датычныя да пажару на складзе кампаніі, якая пастаўляла абсталяваньне ва Ўкраіну, у тым ліку спадарожнікі Starlink Ілана Маска. Прычым падпал замовіла расейская вайсковая група «Вагнэр», паведаміла Reuters.
Непасрэдна ў падпале вінавацяць чатырох, а дваіх — у тым, што яны хавалі інфармацыю аб падрыхтоўцы тэракту.
Іх таксама падазраюць у рыхтаваньні выкраданьня знанага расейскага бізнэсоўца Яўгенія Чычваркіна, які трымае вінны рэстаран у Лёндане.
Яшчэ два фігуранты справы прызналі віну леташняй восеньню і ў гэтым судовым працэсе ня ўдзельнічаюць.
- Дылан Эрл, які прызнаўся ў падпале з абцяжлівымі абставінамі і рыхтаваньні небясьпечных для жыцьця й бясьпекі людзей дзеяньняў, а таксама ў каардынацыі падпалу і кантактах з «Вагнэрам». Эрл стаў першым, каго абвінавацілі паводле новага брытанскага Закону аб нацыянальнай бясьпецы, скіраванага супраць варожай дзейнасьці іншых краін.
- 23-гадовы Джэйк Рыўз таксама пацьвердзіў, што ўдзельнічаў у падпале за грошы ад замежнай выведкі.
Паводле пракуратуры, Эрл і Рыўз плянавалі падпаліць яшчэ два аб’екты ў Лёндане — вінны бар і рэстаран расейскага бізнэсоўца Яўгенія Чычваркіна, а таксама выкрасьці іх уладальніка. Яўгеній Чычваркін публічна крытыкуе расейскія ўлады за ўварваньне ва Ўкраіну і ўваходзіць у Антываенны камітэт Расеі. Улады РФ у 2002 годзе ўнесьлі яго ў сьпіс «замежных агентаў».
Брытанскія ўлады неаднойчы абвінавачвалі Расею і зьвязаныя зь ёй структуры ў правядзеньні шпіёнскіх і падрыўных апэрацыяў як у краіне, так і за яе межамі. Кіраўнік брытанскай выведкі раней заяўляў, што расейскія агенты хочуць выклікаць хаос.
Крэмль адмаўляе ўсе абвінавачваньні, сьцьвярджаючы, што Лёндан несправядліва вінаваціць Маскву ўва ўсякіх нэгатыўных падзеях.
Форум